兒童要長高飲食要點 – 家長對於小朋友身高通常都十分緊張。 我哋通常會幫小朋友做一個詳細嘅營養評估分析， 因為要肯定佢哋可以攝取到足夠嘅營養去發育，又唔會食到啲垃圾食物影響身體健康。 🦒
小朋友其實每一餐都要有足夠嘅蛋白質供應去幫助佢哋身體不斷嘅發育。 所以家長們應該每一餐正餐都要提供足夠嘅蛋白質畀佢哋。 例如雞蛋🥚、牛奶、瘦肉、魚肉及豆類製品等。 不過最好唔好畀餐肉腸仔呢啲劣質營養佢哋， 你都唔想佢哋生啲腸仔手及餐肉腳出嚟😂。 當然每日有兩份高鈣食物可以提供到足夠鈣質畀佢哋嘅骨頭生長。小朋友需要每日1000毫克鈣質先至足夠， 家長可以考慮 提供低脂或脫脂牛奶🥛、低脂乳酪及芝士， 硬豆腐或者高鈣豆奶去補充鈣質。 除此之外而家市面上好多牛奶製品及豆奶製品都添加咗維他命D， 能幫助佢哋咁有效吸收鈣質。 除此之外小朋友每日都要食到兩份水果三份蔬菜🍅🥝🥦🍓🥕。因為水果蔬菜裏面含有好多重要嘅維他命及礦物質， 呢啲營養素對佢哋嘅發育嚟講都十分重要。
當然充足嘅睡眠加埋恆常嘅運動🏊♀⛹♂🚴♀可以增加生長荷爾蒙的分泌， 研究發現太夜瞓嘅小朋友或者唔做運動嘅小朋都可能有身高嘅問題。 如果要快高長大，家長們記得鼓勵小朋友又有一個均衡飲食嘅習慣、恆常嘅運動及充分嘅休息！